Raiisul Wasaaraha Xukuumadda Federaalka Soomaaliya  Xamsa Cabdi Barre, ayaa xafiiskiisa ku qaabilay Ra’iisul Wasaare ku Xigeenka ahna Wasiirka Arrimaha Dibadda iyo Yurub ee Slovenia Mrs. Tanja Fajon, oo booqasho ku timid dalka.
Labada Mas’uul  ayaa ka wada hadlay,  sidii Soomaaliya iyo Slovenia isaga kaashan lahaayeen danaha guud ee labada dal gaar ahaan arrimaha isbeddelka cimilada iyo daryeelka bulshada.
Sidoo kale, waxaa loo hadlay arrimaha amniga guud ee gobalka, gaar ahaan Soomaaliya iyo xuquuqda aadanaha, maadaama ay Soomaaliya ka mid noqoneyso Golaha Amniga ee Qaramada Midoobay oo Slovenia ay xubin ka tahay.
Dhanka kale, Ra’iisul Wasaare Xamsa ayaa uga warbixiyey dagaalka ka dhanka ah Al-Shabaab, isaga oo tilmaamay guulaha ay dowladda Soomaaliya dhinacyada dhaqaalaha, amniga iyo arrimaha bulshada, iyadoo Mrs Fajon ku ammaantay Soomaaliya guulaha waaweyn ee ay gaartay labadii sano ee la soo dhaafay.
Kulanka Ra’iisul Wasaare Xamsa iyo Ra’iisul Wasaare ku Xigeenka ahna Wasiirka Arrimaha Dibadda iyo Yurub ee Slovenia Mrs. Tanja Fajon, ayaa imaanaya xilli ay booqasho ku timid dalka Soomaaliya.