Madaxweynahii hore ee Soomaaliya Maxamed Cabdullaahi Farmaajo ayaa si adag u cambaareeyay xariga magaalada Muqdisho ugu geysteen laamaha amaanka dowladda Federaalka guddoomiyaha Urur siyaasadeedka Shacabka Cabdiraxmaan Saleymaan Jaamac.
Maxamed Cabdullaahi Farmaajo ayaa ku tilmaamay xariga guddoomiyaha Urur siyaasadeedka Shacabka Cabdiraxmaan Saleymaan Jaamac mid muujinayso jihada siyaasadeed ee uu qaatay madaxweyne Xasan Sheekh Maxamuud, gaar ahaan nooca doorasho ee uu hiigsanayo.
“Annaga oo muujinayna inta uu xadgudubkaani ku yeelanayo xasilloonida siyaasadeed iyo hannaanka dimuqraadiyadeed ee dalka, waxaan ugu baaqaynaa Madaxweynaha in uu xorriyaddiisa si deg deg ah ugu soo celiyo Guddoomiyaha Urur-siyaasadeedka Shacabka ee sida sharci darrada ah loo beegsaday” ayuu yiri madaxweyne hore Maxamed Cabdullaahi Farmaajo.
Farmaajo ayaa sidoo kale ugu baaqay madaxda dowladda fedaraalka Soomaaliya iney ka fogaadaan wax walba oo sababi kara hubanti la’aan siyaasadeed, isagoona dalbaday si deg deg ah xuriyadiisa loogu soo celiyo Cabdiraxmaan Saleymaan Jaamac.
“Hay’adaha amaanka heer Federaal waxaan ku adkaynaynaa waajibaadka Dastuuriga ah ee ay u xilsaaran yihiin, iyaga oo ka fogaanaya tallaabooyinka noocaan ah ee wiiqaya kalsoonida shacabka Soomaaliyeed iyo sumcaddooda ciidannimo” ayuu yiri Farmaajo.
Ugu dambeyntii Xariga dowladda Fedaraalka Soomaaliya u geystay guddoomiyaha Urur siyaasadeedka Shacabka Cabdiraxmaan Saleymaan Jaamac waxaa si weyn u cambaareeyay qaar ka mid ah Xisbiyada iyo siyaasiyiinta mucaaradka ku ah dowladda, kuwaas oo si wadajir ah u dalbaday si deg deg loo sii daayo guddoomiye Cabdiraxmaan Suleymaan.