Gudoomiye ku xigeenka ururka warbaahinta Puntland ee MAP oo kulan la qaatay Maareeyaha Hay’adda isgaarsiinta Qaranka Soomaaliya
Maanta waxaa kulan muhiim ah yeeshay Maareeyaha Guud ee Hay’adda Isgaarsiinta Qaranka Soomaaliya, Mudane Mustafa Yasin Sheekh, iyo Gudoomiye ku xigeenka ururka warbaahinta Puntland ee MAP ahna Agaasimaha SBC Radio/TV, Maxamed Dek Abdalla.
Kulankan ayaa ka dhacay xafiiska Maareeyaha Hay’adda, kaas oo uu martiqaad rasmi ah u fidiyay Agaasimaha SBC.
Intii lagu guda jiray kulanka, Maareeye Mustafa Yasin Sheekh ayaa ka warbixiyay shaqada muhiimka ah ee ay hay’adda qabato, gaar ahaan bixinta laysamada shirkadaha ku shaqeeya adeegyada isgaarsiinta, oo ay ku jiraan idaacadaha, telefishinnada, shirkadaha internet-ka, iyo adeegyada fiber-ka. Sidoo kale, wuxuu sharaxaad ka bixiyay sida ay u maamulaan domainka internetka ee Soomaaliya (.SO) iyo qorsheyaasha ay hay’adda mustaqbalka ka leedahay horumarinta isgaarsiinta dalka.
Gudoomiye ku xigeenka MAP ahna Agaasimaha SBC ayaa isaguna dhankiisa ka hadlay caqabadaha ay warbaahinta ka qabaan helitaanka website-yada ku dhisan domainka .SO, wuxuuna soo hadal qaaday muhiimada ay leedahay in warbaahinta iyo shirkadaha isgaarsiintu ay fahmaan shuruucda iyo nidaamyada ku xeeran adeegyada isgaarsiinta si loo ilaaliyo sharciga.
Kulankan ayaa sidoo kale diiradda lagu saaray sidii loo xoojin lahaa fahamka warbaahinta ee ku saabsan muhiimadda ay leedahay helitaanka laysamada iyo kala dambeynta isgaarsiinta, si loo hormariyo adeega warbaahinta iyo badbaadada bulshada.
Hay’adda Isgaarsiinta Qaranka Soomaaliya waxay qabataa shaqo muhiim ah oo la xiriirta nidaaminta iyo ilaalinta adeegyada isgaarsiinta dalka, taas oo ay ku jirto bixinta laysamada iyo hubinta adeegyadu inay u socdaan sida waafaqsan shuruucda dalka.
Kulankan ayaa ah mid muujinaya wada-shaqeynta iyo iskaashiga u dhexeeya warbaahinta iyo hay’adaha dowliga ah si loo xaqiijiyo horumarinta isgaarsiinta Soomaaliya.