Madaxweynaha dowladda fedaraalka Soomaaliya Xasan Sheekh Maxamuud iyo wafdi balaaran oo uu hoggaaminayo ayaa goordhaw oo maanta ah gaaray dalka Jabuuti.
Madaxweynaha iyo wafdigiisa ayaa si diiran loogu soo dhaweeyay garoonka diyaaradaha magaalada Caasimadda ah ee Jabuuti, isagoona halkaas kulan gaar ah kula yeelan doona dhigiisa Jabuuti Ismaaciil Cumar Geelle.
Madaxtooyada Soomaaliya ayaa shaacisay in labada nadaxweyne ay ka wada hadli doonaan arrimo ay ka mid yihiin xoojinta xiriirka soo jireenka ah iyo iskaashiga istaraatiijiga ee ka dhexeeya labada dal, gaar ahaan dhinacyada amniga, dhaqaalaha, siyaasadda iyo adkaynta xasiloonida guud ee gobolka.
Labada nadaxweyne ayaa sidoo kale la filayaa iney ka wada hadli doonaan dagaalka ay dowladda Soomaaliya kula jirto kooxaha Al-shabaab iyo Daacish ee bilahii lasoo dhaafay sida xoogan uga socday qeybo ka mid gobolada dalka.
Ugu dambeyntii dowladda Jabuuti waxay ka mid ah dowladaha Soomaaliya sida weyn uga taageero dhinacyo badan oo ay ugu horeyso amniga, waxaana Jabuuti ka jooga gudaha Soomaaliya, gaar ahaan gobolka Hiiraan ciidamo qeyb ka ah nabad ilaalin howlgalka cusub ee AUSSOM.