Xulka Qaranka Tunisia ee Ciyaartooyda 17 jirada ayaa Talaadadii waxa ay ku bilowdeen tartanka Koobka Qaramada Afrika ee 17 jirada ee ka socda dalka Morocco guul sahlan oo ay ka gaareen dhigoodi xulka Soomaaliya.
Xulka Tunisia ee 17 jirada ayaa si weyn uga firfircoonaa Ciyaartooyda 17jirada ee xulka Soomaaliya waxaana ugu dambeyn 90kii daqiiqo ee Ciyaarta loogu talagalay kusoo idlaatay 3-0 ciyaartii furitaanka Group D.
Xulka Tunisia ayaa hogaanka u qabatay ciyaarta daqiiqadii 6-aad waxaana u dhaliyay goolkoodi 1aad ciyaaryahan Fadi Tayachi, kadib Anis Saidi ayaa kubad cajiib ah si xirfad leh ugu baasay isla ciyaaryahankii goolka 1aad dhaliyay, waxana uu dhaliyay goolkii labaad daqiiqadii 43-aad ee ciyaarta.
Al-Tayyachi ayaa dhameystiray seddexleydii Tunisia isagoo darbo qurux badan ka dhaliyay daqiiqadii 58aad xulka 17 jira ee Soomaaliya oo guul daro qaraar ku bilowday tartanka Koobkaan.
Tunisia ayaa kaalinta 1-aad ku hogaaminaysa Group-ka D, waxana ay leedahay 3-dhibcood, waxana ay farqiga goolasha kaga horeeyaan Senegal oo ku jirta kaalinta labaad oo 1-0 uga badisay Gambia fiidnimadii Talaadada.
Tunisia waxa ay wareegga labaad la dheeli doontaa Senegal maalinta Jimcaha ee 4-ta April, ka hor inta aan la soo gebagebayn heerka Group-yada oo ay la ciyaari doonaan Gambia wareegga saddexaad ee isniinta April 7.