Madaxweynaha dawlada KMG Soomaaliya Sheekh Shariif Sheekh Axmed ayaa hurdo ladin habeenimadii xaley isagoo guure iyo socod habeenimo ku soo kala bixiyey qaybo ka tirsan magaalada Muqdisho ee caasimada ah gaar ahaan fariisimada ay ku sugan yihiin ciidamadiisa.

Sheekha oo tuute ku labisan ayaa socodkiisa saq dhexe socodka ah wuxuu bilaabay 1-dii habeenimo isagoo ka bilaabay Isgoyska KM4, wuxuu uga sii gudbbay Tarbuunka, isagoo uga sii talaabay Isgoysyada Hawl-wadaag, Cali Kamiin, Siinaay, Afarta Jardiino, Sanca, Fagax Warshada Baastada.

Goobaha uu booqdey madaxweynaha ayuu wuxuu kula kulmay saraakiisha ciidamada dawlada isagoo ka dhageystey warbixino ku aadan xaaladaha aagaga ay ku sugan yihiin, sida ay u socdaan hawlaha dib u soo celinta amaanka caasimada & warbixino kale oo la xiriira ciidamada.

Kormeerka guure socodka ahee uu madaxweynuhu sameeyey ayaa waxaa ku wehliyey wasiirka Arimaha Gudaha iyo Amniga Qaranka C/samad Macalin Maxamuud & saraakiil ka tirsan ciidamada dawlada gaar ahaan kuwa xooga dalka.
Ujeedada kormeerka Sheekh Shariif ayaa lagu tilmaamay inay aheyd mid uu ugu kuurgalayey sida ay socoto hawlaha ciidaamda iyadoo wararku sheegayaan in ay soo gaareen warar sheegaya habacsanaan ku aadan sida ay amaanka u sugayaan ciidamada dawlada kuwaasi oo la sheegay in xiliyada habeenkii ah ay jilicsan tahay habka ay amaanka u sugaan.

Socdaalka Sheekh Shariif ayaa ku soo beegmaya iyadoo labadii habeen ee ugu dambeysay xarunta madaxtooyada magaalada Muqdisho ee Villa Somalia duqeyn lagu bartilmaameystey taasi oo ay wax ku noqdeen dad rayid ah, waana mida keentey in Sheekh Shariif uu aad uga caroodo habka amaan sugida ciidamada dawlada.

Madaxweynaha ayaana Ciidamada  ku gubaabiyay sidii ee wax uga badali lahaayeen qaabka ee hada u sugaan amaanka loogana baahna yahya in ee adkeeyaan amaanka isagoona si aad u u amaanay hawlihii ay soo qabteen ee ku aadanaa xoreynta magaalada Muqdisho.

DAAWO SAWIRADA

Axmed Aar
SBC Muqdisho
ahmedaar@live.com