Qaramada Midoobey iyo Midowga Afrika ayaa ka hadlay xiisada ka soo cusboonaatay dalalka Jabuuti iyo Eritrea, kaddib markii Ciidamada Eritrea ay qabsadeen dhulka lagu muransan yahay ee xuduuda labada dal ay wadaagaan.

Afhayeenka Xoghayaha Guud ee Qaramada Midoobey ayaa sheegay in xiisada u dhaxeysa dalalka Khaliijka ay sababtay inuu dib u cusbnaado khilaafkii dhanka sohdimaha ee u dhaxeeyay dalalka Eritrea iyo Jabuuti.

Guddoomiyaha Midowga Afrika Mousa Faki ayaa isna sheegay inuu ka walaacsan yahay xaalada ka soo cusboonaatay labada dal, waxaa uu tilmaamay in wafdi soo baara arrintan uu u dirayo Jabuuti.

Jabuuti ayaa ku eedeysay in Ciidamada Eritrea ay qabsadeen dhulka buuraha ee Dumeira, iyadoo heegan gelisay ciidamada, waxaa jirta cabsi laga qabo in dagaalo cusub uu labada dal dhex maro.

Wasiirka Arrimaha Dibada Jabuuti Maxamuud Cali Yuusuf ayaa sheegay in ciidanka la geliyey heegan ayna cabasho u gudbiyeen Qaramada Midoobay iyo Midowga Afrika.

Ciidamo Nabad ilaalin oo ka socday Qatar ayaa maalmo ka hor isaga baxay dhulka buuraleyda ee Dumeira, oo howlo nabad ilaalin u joogeen, kaddib markii Eritrea ay xiriirka u jartay Qatar, iyadoo taageereysay Isbaheysiga uu Sacuudiga hoggaamiyo, halka dowladda Jabuuti ay hoos u dhigtay xiriirkii diblomaasi ee ay la laheyd Qatar.

Labada dal ayaa isku heysta dhulkaas, waxaana qaraar horay uga soo baxay Golaha Ammaanka ee Qaramada Midoobey lagu go’aamiyay in labada dal dib uga gurtaan ciidamadooda, iyadoo sanadkii 2010 ciidan ka socda Qatar la geeyay, si ay u kala dhex galaan.

14kii Jun ayey Qadar kala baxday ciidankeedii nabad ilaalinta soohdinta ay ku muransanyihiin labadaas dal, maalin kadib markii ay la safteen xulufada Sucuudiga ee go’doominta ku haya.

Wasiir Ali Yuusuf wuxuu sheegay in Qadar la baxday ciidankeedii 12kii iyo 13kii Jun, isla maalintaasna ay u soo dhaqaaqeen ciidanka Eritrea buurihii la isku hayey.

“Hada waxay si buuxda gacanta ugu hayaan buurta Dumeira iyo Jasiirada Dumeira. Tani waxay xadgudub ku tahay qaraarkii Golaha Amaanka” Ayuu yiri Wasiir Yusuuf.

June 2008 ayey gacanta isula tageen markaas oo Jabuuti ku eedeysay Asmara inay ciidankeeda u soo dhaqaajisay xuduuda, waxaa laga cabsi qabaa inuu markale dagaal dhexmaro.