Shir jaraaid oo ay xarunta madaxtooyada Puntland ku qabteen qaar ka mid ah golaha wasiirada Puntland Waxay dhaliil kaga muujiyeen shaqsiyaad aysan carabaabin oo ay sheegeen in ay qorsheynayaan waxkabedelid ay ku sameeyaan heshiiskii Addis ababa ee dhinacyada Soomaalidu ku wada gaareen sidii looga bixilahaa xiliga kumeelgaarka iyo heshiisyadii ka horeeyey ee garoowe iyo Muqdisho.

Faarax Cali Shire wasiirka maaliyada Puntland oo warfidiyeenada u aqriyay warsaxaafadeedka ayaa sheegay in Puntland ay ogaatay in la wado qorshe wax looga bedelayo heshiiskii Addis Ababa iyo kuwii ka horeeyay Puntlana ay ka digeyso.

“Puntland Waxay ka digeysaa in geedi socodka Nabada Soomaaliya laga leexiyo wadadiisi, waxaa soo baxaya Muuqaalo kala duwan oo muujinaya in kooxo dano gaara leh ay isku dayayaan in ay wadada ka leexiyaan geedi socodka Nabadda Soomaaliya” ayaa hadaladiisii ka mid ahaa Wasiirka Maaliyada Puntland.

Waxa uu carabka ku adkeeyay Wasiirku in Dowlada Puntland aysan Masuul ka noqondoonin wax walba oo is hortaag iyo carqalad ku noqonkara dhameystirka Xiliga kala guurka, Dastuurka iyo Arimo badan oo wadada ka leexin kara geedi socodka Nabadka Soomaaliya.
Dhanka kale waxa uu sheegay Wasiirku in Puntland ay diyaarisay Ergooyinkii uga qeyn qaadan lahaa Ansixinta Dastuurka Soomaaliya iyo xubnihii ka mid noqon lahaa Baarlamanka Cusub ee Soomaaliya.

Ma ahan markii ugu horeysay oo ay Puntland dhaliil u jeediso dhinacyada Soomaalida waxayna ku soo beegmeysaa xili dhowaan dhinacyada Soomaalida ay heshiis lagaga gudbayo xiliga Kumeergaarnimada ku saxiixdeen dalka Itoobiya .

Maxamed Siciid
SBC International Garoowe