Mucjisooyinka Rabbi waa kuwa aanay ku jirin shaki iyo dood isla markaana marqaati loo yahay, waxaana ka mid ah abuurista Bini’aadamka, sameynta cirka, dhulka, badda, buuraha iyo walina kuwa kale oo fara badan oo loogu tala galay dhamaantood in lagu xaqiijiyo awooda iyo sareynta ALLE SWT.

Hadaba mucjisooyinkii RABBI kuwii ugu dambeeyey mid ka mid ah ayaa dhawaan ka dhacdey dalka Nayjeeriya ee Galbeedka Qaarada Afrika ka gadaal markii todobaadkii hore magaalada Lagos uu ku dhashay ilmo gacanta ku haysta Kitaabka Qur’aanka Kariimka.

Wargeyska The Nigeriandaily oo warbixintan daabacay maalinimadii Khamiista ayaa sheegay in hooyada wiilkan dhashay lagu magacaabo  Mrs. Kikelomo Ilori, oo 32 sano jir ah ay tahay Kirishtaan isla markaana ay aad ula yaabtey markii wiilkeeda uu ka soo baxay isagoo gacanta ku haysta Kitaab yar oo Qur;aanka Kariimka, iyadoo Umulasadii ay arintaasi aad ula yaabtey markii ay ogaatayna u sheegtey hooyada ilmaha dhashay in ay iska tuurto Kitaabka balse ay diiday Mrs. Kikelomo.

Haweenayda wiilkan umushay ee lagu magacaabo Mrs. Kikelomo oo ka shaqeysa goobaha dumarka Timaha loogu hagaajiyo ayaa sheegtey in uurka wiilkan ay laheyd 10 bilood, waxay sheegtey in Aabihiis ay kala tageen ka dib markii uu ku taliyey in uurkaasi ay iska soo rido balse ay ku diiday, isagoo markaasi ka dibna si cad ugu sheegay in ay kaligeed ku tahay uurka oo aanay waxba u soo raacan karin, iyadoo sheegtey in ay go’aan ku qaadatey in ay xafido uurkaasi.

“Umulisadeydu waxay aad ugu dhibtootay dhalmada ilmahayga, markii aan dhaley waxaan aragnay ilmaha oo gacanta ku sita buug, waan eegnay waxaana ogaanay in uu yahay Kitaabka Qur’aanka ee Muslimiinta, ka dib Umulisadu waxay igu tiri iska tuur, laakiin waan diiday waxaana u sheegay inaan doonayo in aan tuso Hooyadey, intii aanan qaadin wax talaabo ah” ayey hadalkeeda sii raacisay Mrs. Kikelomo.

Baadari Senior Rev. Victoria Yetunde Dada oo ah baadirga kaniisad ku taal xaafada ay degan tahay haweenayda ilmaha Kitaabka isagoo haysta dhashay ayaa sheegay in Mrs Kikelomo ay Kaniisada had iyo goor imaan jirtey iyadoo u socota wax uu ku tilmaamay cibaadeysi.

“Markii ay ii sheegtey in ninkii ilmahan dhalay uu dayacay, waxaan u sheegay inaanay ilmaha iska soo tuurin, waayo waxaa dhici karta inay ku dhimato xiliga ilmo iska soo ridida ay wado” ayuu yiri baadirigaasi oo saxaafada la hadley.

Dr. Bode Tawak oo ah madaxa caafimaadka ee Isbitaalka Bodet Hospital ee ku yaal xaafada Ikeja ee magaalada Lagos ayaa sheegay in ay tahay wax macquul ah in ilmahaasi ku dhashay isagoo Kitaab gacanta ku haysta, isagoo u cuskaday sida uu sheegay Saynis ahaan.

Dr. Munir Yusuf oo ah qabiir dhanka Caafimaadka oo fadhigiisu yahay gobolka Kaduna ee dalka Nayjeeriya ayaa sheegay in ay tahay wax macquul ah arintan.

Link-ga video hoose ka daawo mucjisadan wiilkan yar ee Kitaabka Qur’aanka gacanta ku haysta iyo dad boqolaal gaaraya oo isagu soo baxay gurigii iyo Isbitaalkii uu ku dhashay wiilkaasi.
Halkan Riix

Daawo

Yaasiin Faradheere
SBC International Stockholm