Mid ka mid ah xubnaha ugu muhiimsan golaha wasiirada maamulka Somaliland ayaa loo diiday Visaha (dal ku galka) dalka Turkiga, isagoo qayb ka ahaa wasiiro ka kooban oo ka socdey maamulka Hargeysa oo Turkiga kaga qayb galaya shir looga hadlayo arimaha Soomaaliya oo Jimcaha ka furmaya magaalada Istanbul.

Wasiirka Hawlaha Guud iyo Guriyeynta Axmed Cabdi Xaabsade, ayaa maanta lagu wargaliyey inaanu qayn ka noqon doonin wafdiga Turkiga tagaya ee ka socda Somaliland taasi oo lagu macneeyey isagoo Visaha ku dalbadey Baasaboorka Somaliland oo ay ku qoran tahay “Jamhuuriyada Somaliland”, arintaasi oo ay ku gacan sayrtey wasaarada arimaha dibada Turkiga oo sheegtey in ay Soomaaliya u aqoonsantahay Jamhuuriyada Somalia isla markaana Baasaboorka Soomaaliga oo kaliya ay ku bixinayso wixii Visaha ah oo la siinayo muwaadiniinta u dhashay Soomaaliya ee aan haysan Baasaboorada dawlado la aqoonsan yahay.

SBC ayaa ogaatey in Maamulka Somaliland afar wasiir oo ka tirsan ay dhawaan dalbadeen Visaha ama dal ku galka dalkaasi, waxaana la xaqiijiyey in wasiirada arimaha dibada Maxamed C/laahi Cumar, Qorshaynta Qaranka Sacad Cali Shire, Macdanta & Biyaha Xuseen Cabdi Ducaale & Wasiirka Hawlaha Guud iyo Guriyeynta Axmed Cabdi Xaabsade, balse Visaha loo ogolaadey sadexda wasiir oo kale oo watey Baasaboor Ajanabi ah, iyadoo loo sheegay Axmed Xaabsade inaanu sifo sharci ah ku gali karin dalka Turkiga, hadii uu doonanaya ay tahay in uu qaato Baasaboor Soomaali ah, arintaasi oo keentey in uu ka harey diyaaradii wafdiga Somaliland ka qaaday Magaalada Barbara kuwaasi oo ka koobnaa laba wasiir iyo xubno kale oo ka socey Bulshada Rayidka halka wasiirka Macdanta & Biyaha uu Turkiga ka soo galey dhanka dalka Mareykanka.

Axmed Cabdi Xaabsade oo saxaafada la hadley wuxuu qiray arintan, isagoo sheegay in baasaboorka Somaliland ee uu haysto uu ugu soo bixi waayey Visihii uu ku tagi lahaa dalka Turkiga uuna kaga mid noqon lahaa wafdiga Somaliland ee ka qayb galaya shirka Istanbul.

Fadeexada qabsatey wasiir Xaabsade & waji gabaxa ku dhacay sheegashada Somaliland Jamhuuriyad Madaxbanaan ayaa waxaa si weyn maanta looga hadal hayaa goobaha la isagu yimaado ee magaalooyinka Somaliland, fadhi ku dirirada iyo waliba xarumaha dawlada, iyadoo dadku su’aalo iska waydiinayaan aayaha sheegashada gooni isu-taaga Somaliland oo talaaban ku noqonayso mid fashil & ceeb ku ridaysa.

Shirkii bishii February ka dhacay magaalada London ee ku aadana arimaha Soomaaliya ee ay soo qabanqaabisay dawlada Britain ayuu Axmed Cabdi Xaabsade wuxuu ka mid ahaa wafdigii uu hogaaminayey Madaxweynaha Somaliland Axmed Siilaanyo, iyadoo Visaha loo saarey baasaboor Soomaali ah oo loo sameeyey xiligaasi sida ay SBC u xaqiijiyeen ilo wareed oo la isku haleyn karo.

SBC News Desk