Maan iskaba daayo(Gabay murti ku dheehan tahay oo kahadlaya Sidii uu Abwaan…

Dhibaatada Qaadku ku hayo Ummada Soomaaliyeed meel kasta oo ay ka joogaan dumida ayaa sii ko0rdhacaysa, iyadoo arintan si weyn looga dareemay meel kasta, hadaba waxaan idiin soo bandhigaynaa gabay murti ku dheehan tahay oo kahadlaya Sidii uu Abwaanku Qaadka isaga daayey

( kudayo  oo iska daa Qaadka )

Abwaan Maxamed Dhagaafe Cilmi Wuxuu yiri !

Duhurkii markuu soo dhacoo qaylo kor u duusho
Qofwaliba wuxuu doonayaa inuu far duubtaaye
Haddii aan danyare ahay anigu duunyo aan dhaqanin
Dahabshiilna laysoo dhigayn doolarkii lacagta
Docka tuurka barabaraha aan laygu darajaynin

Dawo malahan oo meel xunbuu igu danbaysiine
Intaan dayday xayraami laa maan iskaba daayo,.

Doondoonistiisii adoo daal la socon waayay
Casar dabadi uurbeys haddii lagula soo doonto
Darintiyo sigaarkaba markii aad dabari waydo
Dagi maysid oo shaahi baa kaaga sii darane
Darmuus uu nin iibsaday intaad koob la daba joogto
Dawo malahan oo meel xunbuu kugu danbeysiine
Dawarsiga intaan baran lahaa maan iskaba daayo,.

Adigoo doraad cunay shalana calafku kuu diiday
Haddii maanta lagu daba marshoo dani ku seegsiiso
Durba seexan mayside waxbaa diidan gama iiye
Dubaab aadan arag iyo dhiqlaa diirka kaa xuliye
Balo aan la daalacan ayaad dila tiraahdaaye
War duqii mawaasheey ku oran dariska kuu dhow,e
Jin intaan dagaalami lahayn maan iskaba daayo,..

Beri baan dabarayaa haddii lagugu sii daayo
Asaad doorka doorkiisa kale soo dalici waydo
Dukaanbaa la xiray iyo la diid daynta iga dhawre
Dumarkiyo ragaas gadahaa waa dir dhagaloode
Inkastood daroorido dhaguhu uma daloolaane
Dacalada nin suuq lagu dhagana waa damiir xumiye
Intii sharaftu iga duuli layd maan iskaba daayo,..

Cibaado iyo diin seeg nin qaad dabada haystaaye
Daruus iyo tacliin waa horey kala dalaafeene
Dookhiisu waa maalintaa kuu daldalayaaye
Inkastoo daruurtiyo marqaan dayaxa gaarsiiyo
Dib ayuu shalaayaa markuu daanka mariyaaye
Dariiqyada ayuu uga go’aa daymihii hore,e

Duligaas intaan qabi lahaa maan iskaba daayo,.

Dadkoo seexday layl dama ayaad dibada meertaaye
Waxaad daris la noqotaa intii doorsan aadmiga,e
Daryaankiyo sarqaankaad la tahay ul iyo diirkeede
Ilaa waagu daalacana waad wada dikaysaane
Haddii aan dil dhicinoon midkiin meesha lagu dooxin
Wixii diintu diidiyo sinaa lagu danbaysiine
Intii aan dibood noqon lahaa maan iskaba daayo,.

Kolkii ay dareerraan ardadu oo dugsiga aado
Daakiraada waaberi markii shaqo la doondoono
Dadabtii ilmaha laga kacshaad dib ugu guurtaaye
Ilaa uu kan kale soo dagana waa dug xaajaduye
Duqda lagu halayn reerka oo howsha lagu daynin
Dullaa laga dhaxlaa biilki aad dumar ka dhowrtaaye
Intii aan dayici laa xilkay maan iskaba daayo,.

Haddaad daaqdo qaadkood misana daynba kari waydo
Dadku kuma ciseeyoo dhamaan waa ku durayaane
Dawdar iyo waxay kugu xusaan danihi ruux mooge
Dunna laguma aamino ninkay dadartu waashaaye
Adigoo da’weynoo xiradu dayrtay madaxaaga
Dukaankii ad dalab ula tagtaa diiday buu orane
Intii aan damiin dayi lahaa maan iskaba daayo,.

Waxaa lagu daneeyaa intaad duunyo leedahaye
Haddii aad dalaaftana ma jiro ruux ku dayayaaye
Mar hadduusan diintii ilaah kugula dooyaynin
Saaxiibka dunidaani waa daanka igu raace
Ninkii aadan qaadkiisa dirin ways dibiriyaaye
Maxaad ii dabari waydaybuu kuugu dudayaaye
Mooryaan intaan dumi lahaa maan iskaba daayo,.

Dumar lagama maarmee midii calafku kuu dooro
Haddii waalid kuu doono oo laydin darajeeyo
Oo daarcad laydiin goglood kula damaashaado
Durbaan iyo mashxarad iyo kolkii gaaf ladiriteeyo
Aroos laguma daahee markii la isu kiin daayo
Qaadiro ninkii daalanaa doorki gudan waaye
Intii aan dabyare noqon lahaa maan iskaba daayo,.

Ilkahoo ku daatiyo afkoo daasad noqonaaya
Muuqaal darnaan kugu dhacdiyo midabka oo dawra
Madaxoo ku diirmiyo tintoo badiba kaa duusha
Durey aan marnaba kaa baxayn daa,in abidkaaba
Dalan baabi socodkoo noqdood saan daldali waydo
Dabeecadaha qaad weeye iyo dagaladiisiiye
Darbi jiif intaan noqon lahaa maan iskaba daayo.

 

 Waxaa Soo diyaariyey
Abukar  Awale ( Qaad diiD
Gudoomiyaha Ladagaalanka Qaadka.

One Response to Maan iskaba daayo(Gabay murti ku dheehan tahay oo kahadlaya Sidii uu Abwaan…

  1. abshir abdalla gooje says:

    boqol toban iyo afarta cadadka quranka karimka ayuu mahadsan yahay nin kasta wax xumana kashega qaad ka.aniga wan cuni jiray mar marna wan cunaa hadan helo .ahala noga gargaro dhibato ayuu ku hayaa bulshadayna somaliye.cawale wuu mahadsanyahay walahi.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

ARTICLE TOOLS
Share to Facebook Share to Twitter Email to friend Print