Maamulka Khaatumo State of Somalia ee dhawaan ka soo baxay kulankii ka dhacay degmada Taleex ayaa si kulul jawaab uga bixiyey hadalo maalinimadii shaley ka soo yeeray madaxweynaha Puntland C/raxmaan Faroole oo ku aadanaa dhismaha maamulkaasi.

Wasiir ku Xigeenka Arimahadda Dibadda Maamulka Khaatumo Farduus Faarax Mire oo saxaafada soo gaarsiisey qoraal ay ku sheegayso inay uga jawaabayso hadalkii Madaxweyne Faroole waxayna sheegtey in ugu horeyn uga mahadcelinayaan Faroole codka uu ku sheegay in ugu baaqayo Somaliland inay ka baxdo deegaanada SSC ka hor inta aan la tagin shirka London si bay tiri loo gaaro geedi socodka nabadda Soomaaliya loona soo celiyo qaranimadii Soomaaliyeed.

Laakiin Farduus waxay ku sheegtey hadaladii ka soo yeeray Faroole ee ku aadanaa dhismaha maamulka Khaatumo State in uu ahaa mid aanu ka fiirsan waa sida hadalka ay u dhigtaye, isla markaana aanu meel dayin ama ka fakarin saameynta hadalkaasi uu ku yeelan karo bulshada walaalaha ee Khaatumo State iyo Bulshada Puntland.

“Faroole wuxuu si isadaba joog ah u mucaaradayey maamulada iyo hogaanka SSC ee doonaya in deegaanadooda ka saaraan Somaliland, waxaan doonayaa in madaxweyne Faroole uu dhawro darisnimada, xiriirka bulsho ee labada maamul waana in uu joojiyaa faragalinta uu ku bilaabay madaxbanaanida deegaanka iyo maamulka Khaatumo State” ayay hadalkeeda sii raacisay Farduus Faarax Mire oo ah wasiir ku xigeenka arimaha dibada Khaatumo State.

SBC News Desk