88 sano jir u dhashay wadanka Thailand ayaa loo aqoonsadey ardeygii ugu da’da weynaa ee shahaado jaamaceed ku guuleysta ka dib markii dhawaan uu gudoomay shahaadada qaanuunka ama sharciga uuna ka qaatey Jaamacada Sukhothai Thammathirat Open University ee degmada Song Phi Nong ee Koonfurta wadanka Thailand.

Jariidada Bangkok Post oo warkan daabacdey ayaa sheegtey in Sa-nguan Sunthornwong uu mudo 12 sano ah baranayey maadadan isla markaana uu imaan jirey fasalada kala duwan ee Jaamacada
.

Xaflad ku aadanayd qalin jabinta Mr Sunthornwong ayaa wuxuu ka sheegay in ay u qorsheysneyd in aanu ka daalin waxbarashada oo uu lahaa yoolka ku aadan in uu shahaado Jaamacadeed helo.

Sunthornwong ayaa ka maqnaa xafladii balaarneyd ee qalin jabinta dufcadii uu ka tirsanaa oo dhacdey 23-kii January ee sanadkan isagoo xanuun ku dhacay dartiis Isbitaal ugu jirey 39 maalmood, waxaana uu qabsadey xaflad gaar ah oo uu ugu dabaaldegayey shahaadada Jaamacadeed ee uu helay, waxaana xafladaasi ka soo qayb galey maamulka Jaamacada, qoyskiisa, asxaabtiisa iyo waliba eheladiisa.

Arinta xiisaha leh ee uu Sunthornwong xaflada ka sheegay ayaa waxay tahay isagoo daboolka ka qaaday in uu hada qorsheynayno in uu sameeyo Master Degree.

Mowliid Xaaji Cabdi
mowliid.haji@allsbc.com